St’Almanaccu (Dumenicantone Versini)

‘Ssa pezza di puisia in lingua corsa, intitulata St’Almanaccu è scritta da Dumenicantone Versini, cunnisciutu sottu à u pseudonimu di Maistrale, offri un sguardu criticu è umuristicu annantu à l’almanacchi è, par via d’estinsioni, annantu à a cridulità umana faccia à i predizzioni è à l’affirmazioni senza fundamentu. Versini, urighjinariu di Marignana, hà publicatu ‘ssu puema in A Muvra in u 1923, un periudu induva a cultura è a lingua corsi cunniscìani un rinnovu d’intaressu.

U puema principia cù una dichjarazioni pruvucatoria, qualifichendu l’almanaccu di “suminatu di bacii” è di “rè di i baciardi”. ‘Ss’intrata in materia stabulisci subitu subitu u tonu satiricu di l’opara. Versini aprada l’almanaccu com’è metafura par criticà non solu i publicazioni chì pratendini pridiscia l’avvena incù cirtezza, ma ancu a pindenza di i ghjenti à creda in tali predizzioni malgradu a so assurdità evidenti.

A struttura di u puema hè simplicia ma efficaci, ogni strufetta arrichendu un nuveddu elementu à a critica di l’autori. Versini ghjoca incù l’idea ch’è suvità i cunsigli d’un almanaccu impiutu di falsità pudaria cunducia à risultati invirtiti o assurdi à l’intuttu, com’è pona meli è racoglia fasgioli, o aspittà si à ciò ch’è u graneddu suminatu dessi nascita à topa.

L’umurisimu hè un elementu chjavi di ‘ssu puema. Versini sughjirisci irunicamenti chì innanzi cà di cumprà un almanaccu, saria più ghjudiziosu d’invistiscia in bè riali è utuli, tali furmagliu, fica, prugnoli o carda. ‘Ssa ricumandazioni sottulinia l’inutilità parcipita di l’almanaccu à tempu ch’edda richjama à u littori i piaceri simplici è autentichi di a vita.

U puema si tarmineghja annantu à una nota parsunali, l’autori invitendu u littori à mandà li una sporta di spicialità lucali (brocciu è figateddu) innanzi cà di frazà i solda annantu à l’almanaccu. Quissa rinforza u missaghju di u puema annantu à u valori di a rialità è di l’autanticità riguardu à i falsi prummessi.

In cunclusioni, u puema St’Almanaccu di Versini hè una critica murdenti di a cridulità umana è di a pindenza à creda in predizzioni senza fundamentu. À traversu l’umurisimu è a satira, u puema cilibreghja i valori di a simplicità, di l’autanticità è di a sapienza pupulari. Rapprisenta dinò un beddu asempiu di a ricchezza di a litteratura è di a lingua corsi, mittendu in luci a capacità di a puisia rigiunali à abburdà temi univirsali incù spiritu è pertinenza.